Археологийн тэнхим

192

      Улаанбаатарын Их сургуулийг Технологийн Сургууль байх үед Ази судлалын салбар ангиудад Монголын түүх, археологийн хичээлүүдийг анх орох болжээ. Хожим нь 1994 онд Ази Судлалын Факультет нь түүхийн мэргэжлийн ангитай болж Монголын түүх, археологийн мэргэжлийн хичээлийг тусгай курс болгон орох болсон байна.

      Харин 1996 оноос НУФ-ийн бүтцэд өөрчлөлт оруулан Түүхийн тэнхим, Археологийн тэнхим байгуулан ажиллах тухай тус сургуулийн ректор, академич Б.Чадраагийн 1997 оны 9 сарын 17-нд гарсан тушаалыг үндэслэн Археологи-Угсаатны зүйн тэнхим нэртэйгээр байгуулагдан, тус тэнхимийн анхны эрхлэгчээр археологич, доктор (Ph.D), Д.Эрдэнэбаатар, угсаатны зүйн мэргэжилийн багшаар Т.Дисан нар тус тус томилогдон ажиллаж байлаа. 2000-2003 онд Археологийн тэнхэмийн эрхлэгчээр ШУА-ийн Археологийн хүрээлэнгийн захирал Д.Цэвээндорж, орлогч эрхлэгчээр археологич Ч.Ерөөл-Эрдэнэ, 2004-2007 онуудад археологич, профессор Д.Эрдэнэбаатар, 2007-2010 онуудад түүхийн шинжлэх ухааны доктор, профессор, археологич Д.Баяр нар тус тус ажиллаж байсан ба 2010 оноос хойш өнөөдрийг хүртэл Археологийн тэнхмийн эрхлэгчээр доктор (Ph.D), профессор Д.Эрдэнэбаатар ажиллаж байна. Харин тэнхимийн багшаар 2008 оноос докторант Т.Идэрхангай, Э.Мижиддорж, 2009 оноос өнөөг хүртэл С.Оргилбаяр нар ажиллаж байна.

      Тус тэнхим нь Археологич мэргэжилийг Олон улс орон судлал (Археологич-Япон, Солонгос, Хятад судлал) мэргэжилтэй хамтатган бэлтгэхээс гадна Археологич, Түүх соёлын дурсгалт зүйлийн сэргээн засварлалт мэргэжлүүдээр сургалт явуулж байна.

      Түүнчлэн багш, оюутны сургалт-эрдэм шинжилгээний ажлын хүрээнд Архангай аймгийн Өндөр-Улаан сумын Хануй багийн нутаг Хануй голын хөндий дэхь хүрэл зэвсгийн эрин үеийн хиригсүүр, буган чулуун хөшөө бүхий газар, Балгасан тал буюу Гол мод II хэмээх газар хүннүгийн хаад, язгууртны булш бүхий бүлэг дурсгалтай газруудыг түшиглэн байгуулсан хээрийн судалгааны сургалт-үйлдвэрлэлийн баазад оюутны хээрийн дадлага-сургалтын ажлыг хийж гүйцэтгэдэг.

      Мөн Археологийн тэнхим нь ОХУ-ын Санкт-Петербургийн Улсын Их Сургуулийн Археологийн тэнхим, Эрхүүгийн Техникийн Их Сургуулийн Эртний технологийн лаборатори, ОХУ-ын Буриад Улсын Их Сургуулийн Түүхийн тэнхим, АНУ-ын Питтсбургийн Их Сургуулийн Археологийн тэнхим, Япон улсын Каназава Их Сургуулийн Археологийн тэнхим, Солонгос улсын Данкуук Их Сургуулийн “Умардын соёлын хүрээлэн”, БНХАУ-ын Хэнань мужийн Жеянь хот, Лоян хотуудын Археологийн хүрээлэн зэрэг олон улсын их сургууль, эрдэм шинжилгээний хүрээлэнгүүдтэй хамтарсан олон улсын эрдэм шинжилгээний төслүүд болон Монголын Үндэсний эрдэм шинжилгээний суурь судалгааны төслүүд, Монгол нутаг дахь археологийн авран хамгаалах судалгааны ажлын төслүүд болох усан цахилгаан станц, уул уурхай, зам барилгын ажлын талбай зэрэгт томоохон археологийн авран хамгаалах төслүүдийг хэрэгжүүлсээр ирлээ.

      Тус тэнхимийн дотоодын хөрөнгө оруулалттай томоохон төслүүдийг дурдвал 2001-2011 оны хооронд Архангай аймгийн Өндөр-Улаан сумын нутаг, Балгасын тал буюу Гол мод 2-ын язгууртны 1-р булшны цогцолбор малтлага судалгаа, 2014-2015 онд Эгийн голын усан цахилгаан станцын усан сангийн талбай болон усан сангийн дэд бүтцэд хамаарах өндөр хүчдэлийн шугам, асфалтан замын авран хамгаалах малтлага судалгааны зэрэг томоохон ажлуудыг хийж гүйцэтгээд байна.

Зургийн цомог